ថ្ងៃទី ១២ ខែវិច្ឆិកា ឆ្នាំ ២០២៦ — ក្រុមហ៊ុនបច្ចេកវិទ្យាយក្ស LG Electronics បានបង្កើតស្នាដៃដ៏គួរឱ្យភ្ញាក់ផ្អើលថ្មីមួយទៀត ដោយប្រព័ន្ធវាស់ស្ទង់ទំនាក់ទំនងដើរដោយបញ្ញាសិប្បនិម្មិតរបស់ខ្លួនឈ្មោះថា PRISM AI បានឈ្នះពានរង្វាន់កិត្តិយសចំនួន ៣ ក្នុងកម្មវិធី 2026 AMEC Global Communication Effectiveness Awards ដែលរៀបចំដោយសមាគមអន្តរជាតិសម្រាប់ការវាស់ស្ទង់ និងវាយតម្លៃទំនាក់ទំនង (AMEC)។

ពានរង្វាន់ធំៗទាំង ៣ ដែល PRISM AI ដណ្តើមបានរួមមាន៖
• ពានរង្វាន់មាស (Gold)៖ ផ្នែកការប្រើប្រាស់ AI ល្អបំផុតក្នុងការវាស់ស្ទង់ទំនាក់ទំនង (Best Use of AI in Communication Measurement)។
• ពានរង្វាន់ប្រាក់ (Silver)៖ ផ្នែកការប្រើប្រាស់ក្របខ័ណ្ឌវាស់ស្ទង់ល្អបំផុត (Best Use of a Measurement Framework)។
• ពានរង្វាន់ប្រាក់ (Silver)៖ ពានរង្វាន់ Step Change Award ដែលទទួលស្គាល់ពីការអភិវឌ្ឍដ៏លេចធ្លោបំផុតក្នុងដំណើរនៃការវាស់ស្ទង់។
ប្រសិទ្ធភាពដ៏អស្ចារ្យ៖ កាត់បន្ថយពេលវេលាពី ១ ខែ មកត្រឹម ១ ម៉ោង
អ្វីដែលធ្វើឱ្យ PRISM AI ទទួលបានការកោតសរសើរខ្លាំងពីស្ថាប័នអន្តរជាតិ គឺសមត្ថភាពក្នុងការគ្រប់គ្រងទិន្នន័យ និងវាស់ស្ទង់ផលប៉ះពាល់ពិតប្រាកដនៃទំនាក់ទំនង។ ចាប់តាំងពីដាក់ឱ្យប្រើប្រាស់មក ប្រព័ន្ធនេះបានជួយផ្លាស់ប្តូរការងារទំនាក់ទំនងសកលរបស់ LG យ៉ាងខ្លាំងក្លាដូចជា៖
• ល្បឿនរហ័សទាន់ចិត្ត៖ កាត់បន្ថយពេលវេលាធ្វើរបាយការណ៍ពីប្រមាណ ១ ខែ មកត្រឹមតែ ១ ម៉ោង ប៉ុណ្ណោះ។
• វិសាលភាពធំទូលាយ៖ ពង្រីកការតាមដានព័ត៌មានពី ៥៣ ប្រទេស ឡើងដល់ ២០០ ប្រទេស ទូទាំងពិភពលោក និងបង្កើនការតាមដានម៉ាកយីហោពី ៥ ឡើងដល់ ៣០ ម៉ាក។
• ភាពត្រឹមត្រូវខ្ពស់៖ ប្រព័ន្ធ AI នេះអាចច្រោះចោលព័ត៌មានឥតបានការ (Spam) និងខ្លឹមសារមិនពាក់ព័ន្ធបានជាង ៧៨% ជាមួយនឹងកម្រិតភាពត្រឹមត្រូវលើសពី ៩៥%។
ការវាយតម្លៃដ៏តឹងរ៉ឹង និងស្តង់ដារអន្តរជាតិ
ប្រព័ន្ធ PRISM AI មិនត្រឹមតែរាប់ចំនួនព័ត៌មានប៉ុណ្ណោះទេ ប៉ុន្តែវាផ្តោតលើការវាស់ស្ទង់ «ផលប៉ះពាល់ពិតប្រាកដ» ដោយផ្អែកលើគោលការណ៍ Barcelona Principles 3.0 របស់ AMEC និងប្រើប្រាស់ម៉ូដែលភាសាធំៗ (LLMs) ដើម្បីវិភាគអត្ថបទព័ត៌មានភ្លាមៗឆ្លងកាត់ភាសា និងទីផ្សារផ្សេងៗ។ កាន់តែពិសេសទៀតនោះ ការដាក់ពិន្ទុរបស់ AMEC ឆ្នាំនេះមានភាពតឹងរ៉ឹងបំផុត ដោយគណៈកម្មការវាយតម្លៃផ្អែកលើស្តង់ដារឧត្តមភាពជាក់លាក់ និងមិនត្រូវបានអនុញ្ញាតឱ្យប្រើប្រាស់ឧបករណ៍ Generative AI ជំនួយក្នុងការដាក់ពិន្ទុឡើយ ដើម្បីធានាបាននូវសុក្រឹតភាព។
ជោគជ័យនេះគឺជាសមិទ្ធផលអន្តរជាតិធំទី ២ របស់ PRISM AI ក្នុងឆ្នាំ ២០២៦ បន្ទាប់ពីប្រព័ន្ធនេះទើបតែឈ្នះពានរង្វាន់ផ្នែកឧបករណ៍ ឬផលិតផល AI ល្អបំផុត នៅក្នុងកម្មវិធី 2026 IN2 SABRE Awards Asia-Pacific ដែលប្រារព្ធឡើងនៅប្រទេសសិង្ហបុរី កាលពីខែសីហាកន្លងទៅ។
លោក Cho Jung-bum ប្រធានមជ្ឈមណ្ឌល AX នៃក្រុមហ៊ុន LG Electronics បានបញ្ជាក់ថា ការឈ្នះពានរង្វាន់ AMEC ទាំង ៣ នេះមានអត្ថន័យជ្រាលជ្រៅណាស់ ព្រោះវាជាការទទួលស្គាល់ដោយផ្ទាល់ពីស្ថាប័នជំនាញផ្នែកទំនាក់ទំនងសាធារណៈ (PR) ដ៏គួរឱ្យគោរពបំផុតលើពិភពលោក។ លោកបានបន្ថែមថា ក្រុមហ៊ុននឹងបន្តអភិវឌ្ឍវិធីសាស្ត្រ និងពង្រីកសមត្ថភាពរបស់ PRISM AI បន្ថែមទៀត ដើម្បីជួយជំរុញការសម្រេចចិត្តផ្នែកធុរកិច្ចឱ្យកាន់តែមានប្រសិទ្ធភាព។
ប្រភព៖ LG Newsroom